مستەفا عەبدوڵڵا، سەرۆکی فراکسیۆنی یەکگرتووی ئیسلامیی کوردستان لە پەرلەمانی کوردستان رایگەیاند، ” سەرکردایەتیی یەکگرتووی ئیسلامی رۆژی شەممە کۆبووەوە. خەریکی ئامادەکارییەکانین و دوای تەواوبوونیان لە کۆتایی مانگی 12، رۆژێک بۆ کۆنگرە دیاری دەکەین.”

سەرۆکی فراکسیۆنی یەکگرتوو وتی، “خەریکی ئامادەکردنی رەشنووس و پڕۆگرامین، هەموو رۆژێک لەلایەن کەسانی شارەزاوە پێداچوونەوە و هەڵسەنگاندنی بۆ دەکرێت.”

سەبارەت بە پەیڕەوی ناوخۆ، مستەفا عەبدوڵڵا دەڵێت، “بێگومان لەگەڵ بەستنی هەر کۆنگرەیەک کۆمەڵێک بڕگە زیاد و کەم دەکرێن، بۆ ئەمجارەش برگەی نوێ زیاد دەکرێت.”

هاوکات بوخاری جەمیل، بڕیاردەری فراکسیۆنی یەکگرتوو رایگەیاند “دوایین کۆنگرە بەهۆی هەڵبژاردنی خولی شەشەمی پەرلەمانی کوردستانەوە دواخرا، چونکە لە پەیڕەوەکەدا هاتووە ‘بەهۆی هەڵبژاردنەوە دەتوانن بۆ ماوەی ساڵێک کۆنگرە دوابخەین’، چونکە هەموو ئۆرگانەکان دەگۆڕدرێن.”

بڕیاردەری فراکسیۆنەکە دەڵێت، “بەپێی پەیڕەو، ئەمجارە مامۆستا سەلاحەدین محەممەد بەهائەدین ناتوانێت خۆی هەڵبژێرێتەوە بۆ ئەمینداری گشتی، چەند کەسێکی دیکەش خۆیان کاندید کردووە، بەڵام کەسیان رکابەری بەهێز نین لە بەرامبەر ئەو، بۆیە وای بۆ دەچین ئەمجارەش هەر ئەو هەڵدەبژێردرێتەوە.”

بە وتەی بوخاری جەمیل، “هەریەکە لە عومەر عەبدولعەزیز، ئەندامی ئەنجوومەنی جێبەجێكردن، محەممەد ئەحمەد، بەرپرسی چاودێریی ئەنجوومەنی جێبەجێکار، محەممەد فەرەج، ئەمینداری پێشووی یەکگرتوو و هیوا میرزا، ئەندامی پێشووی ئەنجوومەنی جێبەجێکردنی یەکگرتوو خۆیان بۆ ئەمینداری گشتی بەربژێر کردووە.”

بە گوێرەی پەیڕەوی نێوخۆی یەکگرتووی ئیسلامیی کوردستان، ئەمیندار دەتوانێت دوو خولی یەک لەدوای یەک خۆی کاندید بکات، ئەمینداری ئێستای حیزبەکە ناتوانێت خۆی بەربژێر بکاتەوە، چونکە دوو خولە ئەمینداری گشتییە.

سەلاحەدین محەممەد بەهائەدین، لە خولی 2016-2019 و لە 2019 -2024، ئەمینداری یەکگرتووی ئیسلامیی کوردستان بووە، پێشتر ماوە دیارینەکرابوو، لە دوای راگەیاندنی حیزبەکە لە ساڵی 1994 تاوەکو ساڵی 2012یش ئەمیندار بووە، واتە نزیکەی 18 ساڵ بەسەر یەکەوە، کە دەکاتە لانیکەم 4 خولی هەڵبژاردن.