مه‌زڵوم كۆبانێ، فه‌رمانده‌ی گشتی هیزه‌كانی سوریای دیموكرات (هه‌سه‌ده) ڕایگه‌یاند، دۆخێكی نوێ له سوریا هاتوه‌ته ئاراوه و داعش ده‌ستكردوه‌ته‌وه به هێرشكردن و له ئێستادا 250 هه‌زار كورد له حه‌له‌ب له مه‌ترسیدان، ده‌شڵێت، “ده‌مانه‌وێت كێشه‌كانمان له‌گه‌ڵ توركیا به ئاشتی چاره‌سه‌ر بكه‌ین”.
مه‌زڵوم كۆبانێ ئه‌مڕۆ هه‌ینی له‌میانی كۆنگره‌یه‌كی رۆژنامه‌وانیدا، ڕایگه‌یاند، “هێزه‌كانمان به‌رگری له دانیشتوانی گه‌ڕه‌كه‌كانی شێخ مەقسود و ئەشرەفیە دەکەین له حه‌له‌ب”، هاوكات هێزه‌كانیان هه‌ماهه‌نگیان له‌گه‌ڵ عێراق و سوریا هه‌یه.
په‌یوه‌ست به په‌یوه‌ندیه‌كانیان له‌گه‌ڵ هه‌یئه‌ی ته‌حریر شام، فه‌رمانده‌ی گشتی هه‌سه‌ده باسی له‌وه‌كردوه، “لەگەڵ دەستەی تەحریری شام په‌یوه‌ندیمان هەیە و گفتوگۆ دەکەین، بڕیارمان نه‌داوه دژیان شه‌ڕ بكه‌ین”.
مه‌زڵوم كۆبانێ باسی له‌وه‌شكرد، “چالاکی لەلایەن بەکرێگیراوانی داعشەوە لە بیابانەکاندا هەیە، گەلەکەمان لە ڕەققە، تەبققە، و دێرەزور دڵنیا دەکەینەوە کە هێزەکانی سوریای دیموکرات ئامادەن بۆ پاراستنی هەمو خەڵکی شاری حەسەکە و ناوچه‌كه و داوا لە خەڵکی گشتی ناوچەکە دەکەین لە دەوری خۆیان کۆببنەوە””.
دووپاتی کردەوە، کە سوریا شایەتحاڵی پێشهاتە نوێیەکانە، هەروەها “هێزەکانی حکومەتی دیمەشق لەناکاو داڕما، هێزەکانی سوریای دیموکرات سەبارەت بە ڕوداوەکانی ئەم دواییە لەگەڵ ئەمریکا و ڕوسیا و لایەنە ناوچەیی و نێودەوڵەتییەکان لە نێویاندا حکومەتی عێراق هەماهەنگی دەکەن”.
ئه‌وه‌شی خسته‌ڕو، “بارودۆخی ئێستای سوریا پێویستی بە کردەوەی خێرا هەیە لە پێناو پاراستنی خەڵکی سڤیل و سەپاندنی ئاسایش لە ناوچەکانی باکور و ڕۆژهەڵات”.
فه‌رمانده‌ی گشتی هه‌سه‌ده وتی، “هێزەکانی سوریای دیموکرات کاریان کردوە بۆ کردنەوەی ڕێڕەوێکی مرۆیی بۆ ڕزگارکردنی هاوڵاتیانی مەدەنی لە لادێکانی حەلەب، کە بەشێکی زۆری دانیشتوانی تەل ڕه‌فعەت و ئەلشەهبا بە پاڵپشتی هاوپەیمانی نێودەوڵەتی چۆڵکراون”.
ڕونیشیكرده‌وه، ڕێوشوێنی پێویست دەگرنەبەر “بۆ ئەوەی کێشەکانی ڕۆژئاوای فورات نەگاتە ڕۆژهەڵاتی فورات، ئێمە شەڕی هه‌یئه‌ی تەحریر شاممان نەکردوە”.
Leave a Comment
Your email address will not be published. Required fields are marked with *