نوری مالیكی، سەرۆكی هاوپەیمانی دەوڵەتی یاسا له‌باره‌ی ڕوداوه‌كانی سوریا، ڕایگه‌یاند، ئه‌و ڕوداوانه‌ سەرەتای “پڕۆژەیەكی نوێی تیرۆریستین و پێویستە عێراق بپارێزین”، هاوكات داواشی كرد “حەشد نەچێتە ناو سوریا، بەڵام ئێمە بێلایەن نین و لە هەر شوێنێكدا بێت شەڕ دەكەین بۆ بەرگریكردن لە ئیسلام و مسوڵمانان”.

به‌گوێره‌ی ئاژانسی هه‌واڵی عێراقی، نوری مالیكی ئەمڕۆ هەینی لە وتارێكدا لە قەزای میشخاب لە باشوری پارێزگای نەجەف، رایگەیاند، “فەڵەستین بەدەست ستەمەوە دەناڵێنێت و جیهان بێدەنگە لە بەرامبەر تاوانەكانی تاوانبار نه‌تەنیاهۆ،  لە كۆڕ و كۆڕبەندە نێودەوڵەتییەكاندا چەپڵەی بۆ لێدەدەن”.

ئاماژه‌ی به‌وه‌شكردوه‌، لە مێژوی قەوارەی زایۆنیدا كەس نەیوێراوە ڕاستەوخۆ ڕوبەڕوی ببێتەوە و بۆ یەكەمجار روبەروی  ئەو بڕە زۆرە موشەكانە بوەوە، كە لە غەززە، باشوری لوبنان و ئێرانەوە هەڵدران، “ئێمە لەم جەنگەدا چەندین سەركردەمان شەهیدبون”.

نوری مالیكی باسی له‌وه‌شكرد، “عێراق بە چەندین قەیراندا تێپەڕیوە، لەوانە ئەوكاتەی جیهان لە ڕێگەی تیرۆر و باندە تیرۆریستییەكانی داعشەوە لەسەری ڕێككەوت، بەڵام بە ئەزمونێكی سەركەوتو توانیمان ئەم خاكە بپارێزین، تاوانبار جولانی كە تاقیكردنەوەیەكی نوێ لە تیرۆر ئەنجام دەدات”، داواشی كرد “حەشد نەچێتە ناو سوریا، بەڵام ئێمە بێلایەن نین و لە هەر شوێنێكدا بێت شەڕ دەكەین بۆ بەرگریكردن لە ئیسلام و مسوڵمانان”.

ئه‌وه‌شی خسته‌ڕو، “ڕوداوەكانی سوریا تەنها سەرەتای پڕۆژەیەكی نوێیە و پێویستە عێراق لە شانە نوستوەكان بپارێزین لە هەر شوێنێك لە ڕێگەی یەكێتی نەتەوەییەوە، چونكە هەمو گەلی عێراق لە پاڵ پاراستنی وڵات لە هەر پڕۆژەیەكی تیرۆریستی كە ڕەنگە زیان بە عێراق بگەیەنێت وەستابون”.

له‌باره‌ی مه‌ترسییه‌كانی سه‌ر عێراق، مالیكی وتی، “سوپاكەمان و حەشدی شه‌عبی و دەزگای بەرەنگاربونەوەی تیرۆر و عەشیرەتییەكان توانای پاراستنی عێراقیان هەیە، ئێمە سەر بە رێگای شەهیدە ڕاستگۆكانین، ئەوانیش بنكەی هێزمانن،  خیانەت لەو خوێنە ناكەین كە لە پێناو نیشتماندا ڕژا”.