فەرهاد شامی، وتەبێژی هێزەکانی سووریای دیموکرات (هەسەدە) رایگەیاند: “گرووپێکی بچووک لە خەڵک بە سەرکەوتوویی بۆ شارۆچکەی تەبقە گواستراونەتەوە. ئاوارەکانی دیکەش لە ماوەی چەند کاتژمێرێکی داهاتوو دەگوازرێنەوە”.

شارۆچکەی تەبقە سەر بە پارێزگەی رەققەیە و لە ژێر دەسەڵاتی هەسەدە دایە. بەگوتەی فەرهاد شامی، کاروانێکی 200 ئۆتۆمبێلی لە کوردەکان بەرەو تەبقە بەڕێکراون.

لە ساڵی 2011ـەوە سووریا کەوتووەتە نێو جەنگی ناوخۆوە و لەوکاتەوە هێزە بیانییەکان و چەکدارانی ئۆپۆزیسیۆن لە جەنگەکە بەشداربوون. تاوەکو ئێستا زیاتر لە 500 هەزار کەس کوژراون و نیوەی دانیشتووانی وڵاتەکەش ئاوارە بوون.

لەلایەکی دیکەوە، مەزڵوم عەبدی، فەرماندەی گشتیی هەسەدە وتی، دەیانەوێت ئەو کوردانەی کە لە تەل رەفعەت و ناوچەکانی دیکەی حەلەب دەژین، بگوازنەوە ئەو ناوچانەی کە لەژێر دەسەڵاتی خۆیاندان لە باکووری رۆژهەڵاتی سووریا.

مەزڵوم عەبدی وتیشی: “لەگەڵ داڕووخان و کشانەوەی سوپای سووریا و هاوپەیمانەکانی، بۆ کردنەوەی رێڕەوێکی مرۆیی لە نێوان ناوچەکانمان لە رۆژهەڵات و حەلەب و تەلڕەفعەت، دەستوەردانمان کرد بۆ ئەوەی گەلەکەمان لە کۆمەڵکوژی بپارێزین، بەڵام هێرشی ئەو گرووپە چەکدارانەی داگیرکاری تورک پشتیوانییان دەکات، ئەو رێڕەوەیان پچڕاند.”

فەرماندەی گشتیی هەسەدە راشیگەیاند: “لە هەمان کاتدا بەرخودانی هێزەکانمان بۆ پاراستنی خەڵکەکەمان لە ناوچە کوردییەکانی شاری حەلەب بەردەوامە.”