‏‌‎پسپۆرێکی نەشتەرگەری گشتی دەڵێت، ناسوری کلێنچکە کیسێکە، کە مووی تێدایە و لە بەشی خوارەوەی پشتەوە دەردەکەوێت بە تایبەتی لە ناوچەی کلێنچکەدا، دەشڵێت، توشبوون بە نەخۆشیەکە چەند نیشانەیەکى هەیە لەوانەش هەوکردن و ئاوسانی شوێنی تووشبوو.

دکتۆر سەردار ئیبراهیم فەقێ، ‏‌‎پسپۆری نەشتەرگەری گشتی لە نووسینێکدا ئاماژە بە نيشانه‌كانی توشبوون بە ناسۆری كلێنچه‌ دەکات و دەقى نووسینەکەى بەمجۆرەیە:-

ناسوری کلێنچکە چییە؟

ناسوری کلێنچکە کیسێکە، کە مووی تێدایە و لە بەشی خوارەوەی پشتەوە دەردەکەوێت بە تایبەتی لە ناوچەی کلێنچکەدا، مووەکە لە کیسەکەدا کۆدەبێتەوە و بە تێپەڕبوونی کات دەگۆڕێت بۆ بارستەیەکی بچووک و ڕەنگە تووشی هەوکردن ببێت و ناڕەحەتی بۆ نەخۆشەکە دروستبکات.

توشبوون بە نەخۆشییەکە چین؟

ئەم نەخۆشییە کۆمەڵێک نیشانەی هەیە، کە پێویستی بە سەردان کردنی پزیشک هەیە لەوانەش:-

یەکەم- ئازار لە ناوچەی خوارەوەی پشت، ئەم کیسە دەبێتە هۆی ئازار لە ناوچەی خوارەوەی پشت بەتایبەتی لەکاتی دانیشتندا.

دووەم- هەوکردن و ئاوسانی شوێنی تووشبوو.

سێیەم- تا لێهاتن.

چوارەم- ئازار لە کاتی پیسایی کردن.

پێنجەم- قەبزی.

شەشەم- دەردراوی خوێن یان چڵک، ئەمەش یەکێکە لە نیشانە درەنگەکانی ناسوری کلێنچکە، کە بریتییە لە بوونی دەردراوی زەرد یاخود سەوز یان خوێن و ئازارێکی زۆر کە بۆنێکی ناخۆشی لەگەڵدایە.