سەنتەرى میدیاى پزیشکى بڵاویکردەوە، پووکانەوەی ئێسک حاڵەتێکی پزیشکییە و بە لاوازبوونی ئێسکەکان دەناسرێتەوە، ئەمەش دەبێتە هۆی کەمبوونەوەی چڕی و هێزی ئێسک، دەشڵێن، ژنان مەترسی تووشبوونیان بە پووکانەوەی ئێسک زیاترە لە پیاوان.

سەنتەرى میدیاى پزیشکى لەبارەى نەخۆشى پوکانەوەى ئێسک و نیشانەکانى ڕاگەیەندراوێکى بڵاوکردەوە، کە دەقەکەى بەمجۆرەیە:-

پووکانەوەی ئێسک حاڵەتێکی پزیشکییە و بە لاوازبوونی ئێسکەکان دەناسرێتەوە، ئەمەش دەبێتە هۆی کەمبوونەوەی چڕی و هێزی ئێسک، لە ئەنجامدا ئێسکەکان ناسک دەبن، ئەگەری شکان زیاد دەکات، بەتایبەتی لە شان و بڕبڕەی پشت و مەچەکدا.

زۆربەی خەڵک نازانن تووشی پووکانەوەی ئێسک بوون، چونکە نیشانەکانی نیشان نادات، بەڵام لەوانەیە هەست بە چەند گۆڕانکارییەک بکەیت لەوانە چەمانەوەی پشت و کورتبوونەوەی باڵا و ئازاری بەردەوامی پشت.

چەندین هۆکاری مەترسی بەشدارن لە گەشەکردنی پووکانەوەی ئێسک، لەوانەش:

یەکەم- زیادبوونی تەمەن

دووەم- ژنان مەترسی تووشبوونیان بە پووکانەوەی ئێسک زیاترە لە پیاوان، بەتایبەتی دوای وەستانی سووڕی مانگانە کاتێک ئاستی ئیسترۆجین دادەبەزێت.

سێیەم- مێژووی خێزانی.

چوارەم- هۆکارە هۆرمۆنییەکان، حاڵەتەکانی وەک دابەزینی ئاستی ئیسترۆجین لە ژنان، دابەزینی ئاستی هۆرمۆنی تێستۆستیرۆن لە پیاوان.

پێنجەم- نەخواردنی کالیسیۆم و ڤیتامین دی.

شەشەم- هۆکارەکانی شێوازی ژیان، کەمی چالاکیی جەستەیی، زیادەڕۆیی لە خواردنەوەی کحول، جگەرەکێشان.

خۆپاراستن و بەڕێوەبردنی پووکانەوەی ئێسک بریتییە لە گۆڕینی شێوازی ژیان و ڕێکخستنی خۆراک و پشکنینی چڕی ئێسک و دەرمان لەکاتی گونجاودا بەتایبەت بۆ ئەوانەی مەترسی زۆریان لەسەرە.