پسپۆڕێکی نەشتەرگەرى گورچیلە و میزومیزەڕۆ و پڕۆستات دەڵێت، چەند هۆکارێک دەبنە هۆى درووستبوونى گرێى شێرپەنجەی پڕۆستات لەوانەش تەمەن بە تایبەتى لە دواى ٥٠ ساڵى، هەبوونی پێشینەی خێزانی گرێی شێرپەنجەی پڕۆستات و بۆماوەیی، واتە ئەو جینانەی بەرپرسن لە گرێی شیرپەنجەی پڕۆستات و لە باوانەوە دەگوێزرێنەوە بۆ وەچەکانیان.
دکتۆر هەردی تارق، پسپۆڕى نەشتەرگەرى گورچیلە و میزومیزەڕۆ و پڕۆستات لە نووسینێکدا ئاماژە بەو هۆکارانە دەکات، کە دەبنە هۆى درووستبوونى گرێی شێرپەنجەی پڕۆستات و دەقى نووسینەکەشى بەمجۆرەیە:-
ئەو هۆکارانەی دەبنە هۆى درووستبوونى گرێی شێرپەنجەی پڕۆستات کامانەن؟
یەکەم- تەمەن، هەڵکشانی تەمەن بەتایبەتی دوای تەمەنی ٥٠ ساڵی.
دووەم- هەبوونی پێشینەی خێزانی گرێی شێرپەنجەی پڕۆستات.
سێیەم- ڕەچەڵەک و نەتەوە، واتە ئەو کەسانەی ڕەش پێست و ڕەشتاڵەن ئەگەری درووستبوونی گرێی شێرپەنجە زیاترە تیایاندا.
چوارەم- بۆماوە، واتە ئەو جینانەی بەرپرسن لە گرێی شیرپەنجەی پڕۆستات و لە باوانەوە دەگوێزرێنەوە بۆ وەچەکانیان.
پێنجەم- جگەرە کێشان
شەشەم- قەڵەوی و پارێزگاری نەکردن لە کێش ڕێکی جەستە و وەرزش نەکردن.
حەوتەم-توش بوون بە نەخۆشییە سێکسییە گواستراوەکان.
نیشانەکانی توشبوون بە نەخۆشییەکە چین؟
یەکەم- زوو زوو میزکردن
دووەم-هەبوونی خوێن لەگەڵ میزدا.
سێیەم- لاوازبوونی تەوژمی میز
چوارەم- پچڕپچڕبوونی تەوژمی میز
پێنجەم- هەستکردن بەئازار و سووتانەوە لەکاتی میزکردندا.
شەشەم-هەندێ جار لەدەستدانی کۆنتڕۆڵکردنی میزکردن.
نەخۆشییەکە چۆن دەستنیشان دەکرێت؟
یەکەم-پشکنینی پڕۆستات بە پەنجە لەڕێگەی کۆمەوە.
دووەم-پشکنینی خوێن بۆ(PSA) وە بەرزی ڕێژەی (PSA).
سێیەم-پشکنینی تیشکی موگناتیسی پڕۆستات.
چوارەم-وەرگرتنی نمونە لە پڕۆستات و ناردنی نمونەکان بۆ پشکنینی شانەزانی.
چارەسەریەکان بۆگرێی شێرپەنجەی پڕۆستات چین؟
یەکەم- نەشتەرگەری لابردنی هەموو پڕۆستات.
دووەم- چارەسەر بە هۆرمۆن.
سێیەم- چارەسەر بە تیشک.
Leave a Comment
Your email address will not be published. Required fields are marked with *