بەڕێوەبەرایەتی خۆپاراستنی تەندروستی سلێمانی بڵاوى کردەوە، کەسانى تووشبوو بە نەخۆشى تاى خوێنبەربوون لە قۆناغى سەرەتادا تایەکی بەرزیان دەبێت، هەموو جەستەیان ئازارى هەیە بە تایبەت لە پشت و ملدا، دەشڵێن، لە قۆناغەکانى کۆتایدا نەخۆشەکە تووشى خوێنبەربوون دەبێت.

بەڕێوەبەرایەتی خۆپاراستنی تەندروستی سلێمانی لە ڕاگەیەندراوێکدا ئاماژە بە نیشانەکانى کەسانى تووشبوو بە نەخۆشى تاى خوێنبەربوون دەکات، کە دەقى نوسینەکەیان بەمجۆرەیە:-

نیشانەکانی تووشبوون بە نەخۆشی تای خوێنبەربوون چییە؟

یەکەم- لە قۆناغى یەکەمدا لە ماوەى نێوان سێ بۆ حەوت ڕۆژدا نیشانەکانى نەخۆشى تاى خوێنبەربوون لە کەسى تووشبوودا دەردەکەون.

دووەم- کەسى تووشبوو تایەکی بەرزی دەبێت.

سێیەم- کەسى توشبوو هەموو جەستەی ئازاری هەیە، بە تایبەت لە مل و پشتیدا.

چوارەم- پێدەچێت نەخۆشەکە تووشی سکچوون و رشانەوە ببێت.

پێنجەم- لە قۆناغەکانی کۆتایشدا خوێن بەربوون دەستپێدەکات، بە جۆرێک نەخۆشەکە لە دەم و لووتییەوە خوێن بەردەبێت، پاشان لە پشتیشی پەڵەیەکی خوێن بەربوون دەردەکەوێت، لەوکاتەشدا دەبێت چارەسەر بکرێت.

ئەوەش لەکاتێکدایە، نەخۆشى تای خوێن بەربوون نەخۆشییەکی ڤایرۆسییە، لەڕێگای گەنەوە دەگوێزرێتەوە بۆ ئاژەڵ و لەوێشەوە بۆ مرۆڤ یان ڕاستەوخۆ لە گەنەوە بۆ مرۆڤ به‌هۆی‌ به‌ركه‌وتنه‌وه‌، دواتر له‌ كه‌سێكه‌وه‌ بۆ كه‌سێكی‌ دیکە ده‌گوازرێته‌وە.

جێگاى ئاماژەیە، نەخۆشى تای خوێن بەربوون لە چەند ناوچەیەکى هەرێمى کوردستان بڵاوبووەتەوە و بەوهۆیەوە چەند هاوڵاتییەکیش گیانیان لەدەستداوە.