دکتۆر هێمن مەحمود دەڵێت، ئاوسانی پێیەکان یەکێکە لە حاڵەتە بەربڵاوەکان، کە ڕۆژانە ڕووبەڕووی دەبینەوە و چەندین هۆکارى هەیە لەوانەش نەخۆشى دڵ، نەخۆشی گورچیلە، نەخۆشى جگەر، کاریگەری لاوەکی هەندێک جۆری دەرمان.

دکتۆر هێمن مەحمود پسپۆڕى نەخۆشییەکانی جومگە و ئێسک و رۆماتیزم لە نووسینێکدا ئاماژە بە هۆکاری ئاوسانی پێیەکان دەکات و دەقى نووسینەکەى بەمجۆرەیە:-

ئاوسانی پێیەکان یەکێکە لە حاڵەتە بەربڵاوەکان، کە ڕۆژانە ڕووبەڕووی دەبینەوە، دەکرێ نیشانەی چەندین نەخۆشی بن، لەهەمان کاتدا دەکرێ نیشانەی نەخۆشی مەترسیدار بن، بۆیە پشتگوێخستنی ئاوسانی پێیەکان کارێکی باش نییە.

هۆکاری ئاوسانی پێیەکان چییە؟

یەکەم- نەخۆشی دڵ.

دووەم- نەخۆشی گورچیلە.

سێیەم- نەخۆشی جگەر.

چوارەم- خەست بوونەوە و کڵۆ بونی خوێن.

پێنجەم- کاریگەری لاوەکی هەندێک جۆری دەرمان.

شەشەم- هەوکردنی بەکتریایی یاخود ڤایرۆسی.

حەوتەم- سکپڕی.

هەشتەم- شێوازی ژیان و ئیش و کار.

نۆیەم- کێشی زۆر.

دەیەم- لەپێکردنی پێڵاوی ناتەندرووست.

یانزەیەم- هەوکردنی جومگەیی ڕۆماتیزمی.

دوانزەیەم- هەوکردنی بەستەر و ژێییەکان.

سیانزەیەم- بەرکەوتنی زەبری دەرەکی یاخود کەوتن.

چواردەیەم- مانەوە لە پلەی گەرمی بەرزدا

پانزەیەم- تەمبەڵی غودەی دەرەقی.

شانزەیەم- دەوالی.

حەڤدەیەم- گیرانی کەناڵە لیمفاویەکان.

کەی سەردانی پزیشکی پسپۆڕ بکەم؟

یەکەم- زۆربەی کات ئاوسانی پێیەکان خۆی نامێنێت، بەڵام ئەگەر ئاوسانەکە بۆ ماوەیەک بەردەوامی هەبوو وا باشترە سەردانی پزیشکێکی پسپۆڕ بکەی.

دووەم- ئەگەر ئاوسانەکە لەگەڵیدا تەنگە نەفەسی و ئازاری سنگ و ناڕەحەتی تری لەگەڵدا بوو ئەوا بەزووترین کات پێویستە سەردانی پزیشکی پسپۆڕی هەناوی یاخود بەشی فریاکەوتن بکەی.