ئاسۆ عەبدوللەتیف

هەرێمی کوردستان، هێشتا وەک ڕەگەزی ئارامی و سەقامگیریی سیاسی و جڤاکی تەماشا دەکرێت بۆ ئەمریکاو هاوپەیمانان، ئەوە گرنگەو پێویستە پارێزگاری لێبکرێت، بێگومان ئەو سەقامگیریە بەدڵی “بەغدادو ئەنکەرەو تاران” نییەو ماوەیەکە بە تۆپزی خەریکی چنین و ڕستنی پەیماننانەی تازەی وەک “سایکس پیکۆو لۆزان و جەزائیرن”

بۆیە زۆر کێشەیان لەگەڵ هێرشی درۆنەکانی سەرئاسمان و ئامانجە مەدەنیەکانی شارەکانی کوردستان نیە، پاشان ئێستا هەرێم و کێڵگە نەوتیەکانی وەک بەشێک لە دابینکەری ستراتیژیی گازی سروشتی و نەوتی خاو، بۆ بازاڕەکانی ئەوروپاو جیهان مامەڵەی لەگەڵ دەکەن وەک ئەڵتەرناتیڤی پەترۆڵی ڕوسیا، ئەوە ڕەهەندی دوەمی پرسەکەیەو دیسان عێراق و هاوپەیمانە تەقلیدیەکانی پێیان خۆش نییە.

بۆیە هێرشی درۆن و کردەی موشەکباران بۆ سەرخاکی هەرێم بەبیانووی جۆراوجۆر، لێدانە لە خودی ئەو سەقامگیریی و سەبرە سیاسیەی سەرکردایەتی کورد، یانژی بۆ ئەوەیە دۆخەکە بەتەواوی بشێوێت و لەو گەشەکردنە بدرێت و فەزای سەربازی دروست بکەن دژی قەوارەی هەرێم و کردنی بە حەلەب و تورابوراو مەیدانی ئاڵۆزی و نائارامی تەنها بۆ مەبەستی هەموارکردنەوەی دەستوور بەدڵی ئەقتابگەلە فاشیستەکانی گۆڕەپانی سیاسی و مەندوبەکانیان، کە ماوەیەکە لە درۆن خراپتر تیری ژەهراوی دەهاون و فەزای سیاسیان شێواندوەو ئابڵوقەیان خستۆتە سەرهەرێم و نیازەکانیان نەشاردۆتەوە دژی کوردو فەرمانبەرانی.

بۆیە هێرشی درۆنەکان بەبێ ئاگاداری عێراق نەک ڕوونادات بەڵکو بیریشی لێناکرێتەوە، ئیدانەکردنی دوسێ بەرپرسی سەربازی و ئەمنی عێراقیش تەنها بۆ چەواشەکردنی ڕای گشتی و میدیاکان و رازیکردنی ئەمریکاو یاساکانی جەنگە.

لەپه‌لاماره‌ مووشه‌كییه‌ی شه‌وی (12-13ی ئاداری 2022) کە كرایه‌ سه‌ر ئامانجه‌ مه‌ده‌نییه‌كانی هه‌ولێر تا ڕوداوی دڵتەزێنی سەر فڕۆکەخانەی کشتوکاڵی سلێمانی لەئێوارەی (18ی ئەیلولی 2023) هێشتا عێراقیەکان نایانەوێ بەیاسا ئەو پرسە یەکلایی بکەنەوەو ناگەڕێنەوە بۆ وەرەقەو دیباچە دەستووریەکان و سنورێک بۆ ئەو پاشاگاردانییەی دەوڵەتانی جیرانی دژە هەرێم دابنێن.

پێویست ناکات عێراق بەیاننامە دەربکات و ئیدانەی هەڕەشەکان بکات، دەبێت ڕاستەوخۆ لێپرسینەوە بکات لە باڵوێزو نوێنەرانی ئەو وڵاتانەی کە بوونەتە مەتبەخی گەرم و حەوشەی پشتەوەی درۆنەکان.

بەڕاست ئەی مەندوبەکانی خولگەی حەشدو دژە هەرێم، بۆچی ئەو نوێنەرو باڵوێزانە بانگهێشت ناکەنە پەڕلەمان بۆ ئیستجوابی ئەو پێشێلکاری و سنوربەزاندن و سەروەری شکاندنەی عێراق و هەرێم؟