لەتیف فاتیح فەرەج
1
هێشتا به ته‌واوه‌تی دۆخی
كه‌ركوك ئاسای نه‌بوه‌ته‌وه، تا رق و قین و نیازی خراپیش به‌رده‌وام بێت ئاسای نابێته‌وه جگه له زامداره‌كان چوار شه‌هیدی تر نێژران له‌م باخچه‌یه ” ڕیشه‌یی كوردایه‌تی بوو یانی بۆمان نێژران ” راكان جبوری به‌و نیوه شه‌وه سه‌ردانی ڕێگره‌كانی كردو جگه له سوپاس و په‌یامی سودانی بۆیان پێشیانی وت خوا جه‌زای خێرتان بداته‌وه، جه‌زای خێری پێنج ڕۆژ رێگری و شه‌هید كردنی چوار كوردی بێكه‌س و بێ سه‌ردار.
2
ئه‌و باره‌گایه‌ی شه‌ڕی له سه‌ر ده‌كرێت له‌بنچینه‌دا نه‌هی پارتیه نه‌هی حكومه‌تی عیراقی، ئه‌و باره‌گایه باره‌گای ڕۆشنبیری بوو دیاری گۆڕئارام فه‌له‌كه‌دین كاكه‌یی بوو بۆ رۆشنبیرانی كه‌ركوك، كاتی خۆی نه‌جات حه‌سه‌نی به‌رپرسی لقی پارتی له كه‌ركوك به من و شوان داودی وت ئه‌و باره‌گایه دیاری وه‌زاره‌تی رۆشنبیری و كاك فه‌له‌كه بۆ كه‌ركوكیه‌كان، دواتر كرایه باره‌گای مه‌كته‌بی سیاسی پارتی، ئێستاش كه باره‌گای ئۆپراسیۆنه‌كانی كه‌ركوك و هێزه هاوبه‌شه‌كانه ، جگه له پۆلیس، سوپا، حه‌شد، پێشمه‌رگه و ده‌زگای ته‌ناهی پارتی و یه‌كێتی و دژه تیرۆریشی تیایه، كه ڕاكان وتی سودانی ده‌ڵێت جارێ چۆڵناكرێ عه‌ره‌به‌كان كه‌وتنه سه‌ماو بیریان چوو خوێنی چوار گه‌نجی كورد به ناهه‌ق ڕژاوه.
3
پرسی كورد له كه‌ركوك پرسی وه‌رگرتنه‌وه‌ی چه‌ند باره‌گایه‌ك نیه ، پرسی خاوه‌ندارێتی هه‌موو شاره‌كه‌و پارێزگاكه‌یه ، خوێنی به ناهه‌ق ڕژاوی ئه‌و چوار گیانبازه پێمان ده‌ڵێت بابه‌ته‌كه له‌وه گه‌وره‌تره ، كاتێك بۆ دانانی پارێزگارێكی كورد لایه‌ك له كه‌لی شه‌یتان نایه‌ته خواره‌وه‌و به كه‌س ڕازی نیه ، ئێ ئه‌وه مانای ئه‌وه‌یه یان له سه‌روی خۆیه‌وه پێی ده‌ڵێن نابێت ڕازی بیت ، یان به مه‌به‌ست خوێنی كه‌ركوك و كه‌ركوكیه‌كان هه‌ڕاج ده‌كرێت ، وه‌ك چۆن نه‌وتیش له خیانه‌تێكی بێوێنه‌دا هه‌ڕاجكراو ناونرا ئابوری سه‌ربه‌خۆ .
4
هیچ شتێك قه‌ره‌بووی خوێنی ئه‌ولاوانه ناكاته‌وه، ئه‌وه كۆستێكی گه‌وره‌یه، ئه‌وانه‌ی دۆخه‌كه‌یان گه‌یانده ئێره خوا بكه‌م به خوێنی ئه‌و چوار لاوه داساكێن، چونكه پیلانه‌كه زۆر گه‌وره‌یه ، ناكرێت خه‌ڵكی ئاسای مه‌ترسیه‌كان ببینن و باسی بكه‌ن و سه‌رداره‌كانی سه‌ر قه‌ڵاو نێو كۆشكه‌كان خۆیان نه‌بان و نابینا بكه‌ن.
5
له ڕاستیدا په‌یامه‌كه‌ی سودانی نەدەبوو دوای پێنج ڕۆژ له ڕێگری كردن بێت، ده‌بوو له یه‌كه‌م ڕۆژی ڕێگریه‌كه بوایه، كه په‌یامه‌كه‌شی دا تازه كۆمه‌ڵێك گه‌نج داوای به ئاشتی كردنه‌وه‌ی ڕێگه‌كه‌یان ده‌كرد، هه‌ڵبه‌ت حزبیش بۆ مه‌رامی خۆی خۆی خستبووه نێو ڕیزی لاوه‌كانه‌وه، په‌یامه‌كه واكه‌وته‌وه وه‌ك ئه‌وه‌ی سودانی به دام و ده‌زگا ته‌ناهیه‌كان بڵێت ته‌قه له‌و لاوانه بكه‌ن، ئه‌وه بۆیه تانیوه شه‌ویش نیشانه له سه‌ری لاوه‌كان ده‌گیرا، دوای شه‌هیدبوون و بریندار بوون ئیدی نه‌ك حه‌وت حه‌فتا ته‌قه كه‌ریش بگیرێت هیچ له برینه‌كه ساڕێژ ناكات.
6
بیرتان نه‌چێت جگه له بوونی ڕوحی فاشیزمانه ، ده‌ستی ده‌ره‌كیش ڕۆڵی زۆری هه‌یه، بۆیه پێویسته زۆر هه‌ستیارانه مامه‌ڵه له گه‌ڵ دۆخی كه‌ركوك بكرێت، هه‌ڵبه‌ت ئه‌مه‌ریكاو ئه‌وروپاو نه‌ته‌وه‌یه‌كگرتوه‌كانیش به‌شی خۆیان به‌رپرسیاره‌تیان ده‌كه‌وێته سه‌ر، ڕژانی خوێنه‌كه به‌رپرسیاره‌تی زۆر هێزو لایه‌نی ناوخۆو ده‌ره‌كیه ، هه‌روا له خۆڕانه‌بووه.
Leave a Comment
Your email address will not be published. Required fields are marked with *