سەرتیپ جەوهەر

ئەوەی لەكەركوك روودەدات دەبوو زۆر زووتر رووبدات، هیچ حزب و لایەنیًَك لەسەر پێشێلكاریی مافی گەلی كوردو دەستدرێژییەكانی عەرەب و شیعە نەهاتە دەنگ، بەڵام كاتێك بەرژەوەندی حزب یاخود بۆ بەرژەوەندی حزب دەبینین چ بزوتنێك دروستبووە.

ئەوەی لەكەركوك روودەدات دابڕاو نییە لە بڵاوەپێكردنی هێز لەهێلی بەریەككەوتنی هێزەكانی پارتی و یەكێتیی، بەتایبەت ماوەیەكە باسی كڵاوقاسم و وەرتێ‌ و چەند شوێنێك دەكرێت، بەڵكو ئەوەی هەیە بەشێكە لەیارییەكی مەترسیداری ئیقلیمیی (ئێران و توركیا) لەهەرێمی كوردستان و ناوچەكە! هیوادارین بڕیاربەدەست و هێزبەدەستانی هەرێم نەبنە بەشێك لەم پلانە.

لەدوای رووداوەكانی ریفراندۆم و داگیركردنی ئەو ناوچانە لەلایەن هێزە عیراقیەكان، شیعەو عەرەبی سوننە بەئاشكرا پەلاماری كوردیان داو بەردەوام كورد وەك پێكهاتەی (زۆرینە) لەشارەكە چەوسێنراوەتەوە، بەڵام حزبە سیاسیەكان هیچ بزوتنەوەیەك یان ناڕەزاییەكیان دەرنەبڕی! رێككەوتنی تاكلایەنەی سیاسی و شەراكەت لەپرۆژەی ئابوریی و وەبەرهێنان رێگرێكی گەورەی ئەم بێدەنگیەی لایەنە بڕیاربەدەستەكانی كوردستان بووە، تەنها شتێك كردویانە موزایەدە بووە لەكەناڵەكانی راگەیاندن. ئەو هەموو بەیاننامەیەی ئێستا دەریدەكەن، دەبوو پێشتر بەعەمەلی رێگەیان لەو تەجاوزاتانەی عەرەب و شیعە گرتبا. لەدوای ریفراندۆم بەرپرسانی كورد لە (یەكێتیی و پارتی) ئەو هەموو سەردانەی بەغدایان كردووە، تەنانەت گەشت و سەیرانی هاوبەشی هاوینەهەوارەكانی كوردستانیان لەگەڵ لێپرسراو و بەرپرسانی بەغدا كردووە، ئەرێ‌ خێرە كەس باسی پارێزگاری كەركوك و بوونی حەشدی شەعبی و تەجاوزاتی عەرەب بۆسەر ماف و حقوقی كوردی لەكەركوك نەكرد! بۆیە لایەنە سیاسیەكان نوێنەرایەتی ناڕەزایەتی كورد لەكەركوك ناكەن.

دەبوو زۆر زووتر ئەو بزوتنەوەی ناڕەزاییە هەبوایە، بەمەرجێك ئەجێندایەكی روون و یەكدەنگی لەبڕیاردان هەبوایە، بەڵام ئەوەی ئێستا هەیە دەشێت زیانی زۆری لێبكەوێتەوە بەتایبەت هەم هەرێم لەدۆخێكی خراپدایەو هەمیش لایەنە سیاسیەكان پەرتەوازەن و نەك ناتوانن بەیەكەو بڕیاربدەن، بەڵكو ناتوانن لەسەر مێزی گفتوگۆ دانیشن.

ئێستاش نەچووە بچێت، زۆر گرنگە لایەنە كوردستانییەكان بەرژەوەندی حزبی و شەخسی بەلاوە بنێن و خێرا بەیەكەوە تەگبیرێك لەهەر پێشهاتێكی نوێی شارەكە بكەن و ئەجێندایەكی هاوبەش ئامادەبكەن بۆ مامەڵەكردن لەگەڵ دۆخی نوێی شارەكە.