عەدالەت عەبدوڵڵا

له باشووری کوردستاندا، قەیرانی فکر هەیە. دیوی دووەم و زەقی ئەم قەیرانە قبوڵکردنی واقعە. ڕەنگە زۆرکەس، بە ئاگاوە، یان نائاگایانە، بڵێ، توندوتیژی وتۆقاندن بێدەنگیی دروستکردووە، دەنا واقع قبوڵ کراو نییەو زۆر بەشی کۆمەڵگەش بەرژەوەندیی لەو واقعەدا نییە.

وەڵامی بەندە ئەوەیە کە ئەوەشیان هەر بریتییە لە قبوڵکردنی واقع، چونکە فکر تەواو تەسلیمی بووە، یان ئەرکەکەی کورتبۆتەوە لە پاراستنی جەستە و ڕوح، ئەمڕۆ ئەم ئەرکەیە کە ئاراستەی فکر دەکا بۆ خۆ ڕادەستکردن بەوەی هەیەو سەروەرە، بۆ بیرکردنەوە تەنها لە مانەوە، ئیتر وەک ئەوەی مانەوە خەڵاتێک بێت، ستراتیژێکی وجودی بێ، ئەمما دۆخی سیاسی و کۆمەڵایەتی و ئابووری و سایکۆلۆژیی تۆ لە سایەی بیرۆکەی مانەوەدا چۆنە؟ ئەوە پرسیار نییە، جێی ڕەخنە نییە، چونکە هەم پرسیارو هەم ڕەخنە، ئەوانیش، بەهای کۆمەڵایەتی و سیاسییان نییە ئەگەر وەک مەنەلۆگێک بمێننەوەو گوزارشتیان لێ نەکرێت و بە بیرکردنەوەیەکی تەقلیدییش وا بزانرێت ئەوە تەنها کاری ڕۆشنبیرانە.!

ترس لە باجی ئەو گوزارشت لێکردن و جاڕدانەو زیانی بۆ جەستەو ڕوح و بۆ بەرژەوەندیی کورتمەوداو بێ ئایندەی تاک، واتە ترسێک کە ڕوح شیرینی دروستی دەکات، بە قورسی دەبێته ژێرخانی بێدەنگی و نهێنیی خواست لەسەر هەر فۆرمێکی مانەوە کە گرەنتی تەنها مانەوە خۆی بکات نەک مانەوە لەپێناوێکی باڵا، بۆ غایەت و بۆ ئامانجێک.

قەیرانی فکر لە واقعی ئێمەدا، زۆر بە کورتی، قەیرانی ئیرادەیە بۆ تێپەڕاندنی واقع و بۆ گۆڕینی فۆرمی مانەوە، هەر ئەوەش دەربڕی درێژەکێشانی واقع و لەگەڵیدا درێژەکێشانی گوتاری بۆڵەی سیاسی و بۆڵەی گوزەران و بۆڵەی ترسمانە لە پاشەڕۆژ و لە نادیار.