مەمۆ نیشان، هونەرمەندی رۆژئاوای کوردستان، بەرهەمێکی نوێی بڵاوکردەوە کە لەبارەی بوومەلەرزەکەی ئەم دواییەی رۆژئاوا و باکووری کوردستانە.

ئەم بەرهەمە بەناوی ‘لۆ وەلاتۆ’یە و لە تێکستی بەریشان و لە ئاوازی حەمۆ نیشانە و حیکمەت میلان کاری میکس و ماسترینگی بۆ کردووە.

ئەم بەرهەمە بەشێوەیە ڤیدیۆکلیپ لە کەناڵی تایبەتی مەمۆ نیشان بڵاوکراوەتەوە، تێیدا چەند دیمەنێکی بوومەلەرزەکەی ئەم دواییە رۆژئاوا و باکووری کوردستان لەخۆدەگرێت.

ژمارەی قوربانیانی بوومەلەرزەکانی شەشی شوبات کە بە گوڕی 7.7 و 7.6 پلەی رێختەر باکووری کوردستان، رۆژئاوای کوردستان، تورکیا و سووریایان هەژاند، 50 هەزار کەسی تێپەڕاند، کە زیاتر لە 43 هەزاریان لە باکووری و کوردستان و تورکیا گیانیان لەدەستداوە.

وەزارەتی ناوخۆی تورکیا رایگەیاند، 43 هەزار و 556 کەس لە تورکیا (و باکووری کوردستان) بەهۆی بوومەلەرزەوە گیانیان لەدەستداوە.

بەگوێرەی روانگەی سووری بۆ مافەکانی مرۆڤ، ژمارەی قوربانیانی بوومەلەرزەکەی سووریا شەش هەزار و 747 کەسی تێپەراند، ئاژانسەکە ئاماژەی بەوەشکردووە، ژمارەی ئەو سووریانەی لە ئەنجامی بوومەلەرزە لە تورکیا گیانیان لەدەستداوە، زیاتر لە هەزار و 793 کەسە.