وەزارەتی دارایی هەرێمی کوردستان لە کۆنگرەیەکی رۆژنامەوانیدا ئەو زانیاریانەی بە درۆ خستەوە کە بەشێک لە میدیاکان لە سەر دابەشکردنی مووچەی فەرمانبەرانی هەرێم بەردەوام بڵاوی دەکەنەوە.

هونەر جەمال، وتەبێژی وەزارەتی دارایی حکومەتی هەرێم رەتی کردەوە هیچ بڕە پارەیەک جگە لەو پارەیەی کە بۆ مووچەی مانگی ١٠ رەوانەکراوە گەیشتبێتە دەست وەزارەتەکەیان.

وتەبێژی وەزارەتی دارایی هەرێم، باسی هیچ وادەیەکیشی نەکرد بۆ بڵاوکردنەوەی لیستی مووچەی مانگی ١٠ی فەرمانبەرانی هەرێم، لە کاتێکدا لە رۆژی رابردووەوە میدیاکانی پارتی دیموکراتی کوردستان بانگەشەی ئەوە دەکەن تەواوکاری پارەکە گەیشتووەو لیستی دابەشکردنی مووچە بڵاو دەکرێتەوە.

جگە لە وتەبێژی وەزارەتی دارایی دوو بەرپرسی دیکەی وەزارەتەکە قسەیان لەسەر کێشەکانی لیستی مووچە و ئەو هەنگاوانە کرد کە بۆ چارەسەرکردنی کێشەکان گرتوویانەتە بەر.

كۆڤان تەحسین بەڕێوەبەری گشتیی ژمێركاری لە وەزارەتەکە باسی لەو ٤٣٠ ملیار دینارەکە کرد کە بڕیاری تەمویل کردنی بۆ دەرچووە بەڵام هێشتا رەوانە نەکراوە.

وتیشی تا ئێستا تیممان لە وەزارەتی دارایی لەسەر هێڵە بۆ ئەوەی ئەو پارەیە وەربگرین كە تەمویلی مووچەی مانگێك بكات تا مووچەی مانگی 10ی فەرمانبەرانی پێ دابەش بكەین.

لەبارەی دابەشکردنی مووچەی مانگەکانی ١١ و ١٢ەوە ئاماژەی بەوەشکرد لیستی مووچەی مانگی 11ـی هەرێمی کوردستان وردبینی كراوە و ئامادەیە بۆ تەمویلكردن، هەروەها لیستی مووچەی مانگی دوانزەش پێش هەموو وەزارەتەکانی دیکەی عێراق بە ئامادەکراوی گەیەندراوەتە دەست وەزارەتی دارایی فیدڕاڵ و چاوەرێی وەلامی بەغدا دەکەین.