پزیشكی پسپۆڕی نەشتەرگەری سینگ و دڵ و بۆرییەکانی خوێن دەڵێت، لە دوای وەرگرتنی چارەسەر بە دەرزی دەوالی دەبێت چەند ڕێنماییەك جێ بەجێ بكەین لەوانەش جوڵە و پیاسە کردن و ئاو خواردنەوە بۆ ماوەی کاتژمێرێک  ڕاستەوخۆ دوای تەواوبوونی وەرگرتنی چارەسەر.

دکتۆر ڕەوەند عەبدولڕەحمان عیسا پزیشكی پسپۆڕی نەشتەرگەری سینگ و دڵ و بۆرییەکانی خوێن لە نوسینێكدا چەند ڕێنماییەك بۆ دوای وەرگرتنی چارەسەر بە دەرزی دەوالی دەخاتەڕوو.

دەقەكەی بەمجۆرەیە:-

یەكەم -جوڵە و پیاسە کردن و ئاو خواردنەوە بۆ ماوەی کاتژمێرێک  ڕاستەوخۆ دوای تەواوبوونی وەرگرتنی چارەسەر.

دووەم-خواردنەوەی بڕێکی زۆر لە ئاو و شلەمەنی ڕۆژانە.

سێیەم-خواردنی بڕێکی زۆر لە سەوزە و میوە و چەرەزاتەکان ڕۆژانە.

چوارەم-بەرز دانانی ئەو قاچەی چارەسەری وەرگرتوە ڕۆژانە ۲ کاتژمێر و شەوانەش بە هەمان شێوە.

پێنجەم-پێچانی دوای چارەسەر لە لایەن پزیشکەوە  و لێنەکردنەوەی باندج و لۆکە  بۆ ماوەی هەفتەیەک و تەڕ نەکردنی.

شەشەم-زۆر بە پێوە نەوەستان  لە کاتی ئیش کردنی ڕۆژانە،لە هەر بە پێوە وەستانێک لە کاتی ئیش کردن  ناوە ناوە پیاسەیەک بکرێ  بۆ ماوەی ۱۰ خولەک.

حەوتەم-بەکار هێنانی دەرمانەکان بە پێی ڕێنمایی پزیشک لە کاتی خۆیدا.

هەشتەم-بەکار هێنانی گۆرەوی دەوالی دوای هەفتەیەک لە چارەسەر واتا (دوای لێکردنەوەی باندج و لۆکە ).

نۆیەم-سەردان کردنەوەی پزیشک دوای هەفتەیەک و وەرگرتنی ڕێنمایی زیاتر.