بەشیر تەمەنی 41 ساڵە، ئەندازیار و سیاسەتمەدارە؛ بڕوانامەی لە یاسا، شەریعە، کارگێڕی و بەڕێوەبردندا هەیە و ئینگلیزیش دەزانێت کە ئەمڕۆ دووشەممە، 09-12-2024، هەتەشە بۆ پێکهێنانی حکومەت رایسپارد.

دەستنیشانکردنی بەشیر دوای کۆبوونەوەیەکی سێ قۆڵی نێوان محەممەد بەشیر؛ ئەبو محەممەد جۆلانی، سەرۆکی هەتەشە و محەممەد غازی جەلالی، سەرۆکوەزیرانی حکومەتی بەشار ئەسەد هات.

محەممەد بەشیر لەدایکبووی 1983یە و ئەندازیار و سیاسەتڤانە. لە 13-01-2024ـەوە سەرۆکوەزیرانی حکومەتی رزگاریی سووریا لە ئیدلیب بووە.

بەشیر لە ناوچەی جەبەل زاویە لە پارێزگەی ئیدلیب لە دایک بووە. بڕوانامەی بەکالۆریۆسی لە ئەندازیاریی کارەبا لە زانکۆی حەلەب هەیە.

لە ساڵی 2011 لە کۆمپانیای گازی سووریا بەڕێوەبەری بەش بووە. لە ساڵی 2021 بڕوانامەی بەکالۆریۆسی لە شەریعە و یاسا لە زانکۆی ئیدلیب بەدەستهێناوە. دوو بڕوانامەی نێودەوڵەتی لە کارگێڕیی گشتی و بەڕێوەبردنی پڕۆژەدا هەیە. کۆرسی (پێشکەوتوو)ـی زمانی ئینگلیزی تەواو کردووە.

محەممەد بەشیر بۆ ماوەی دوو ساڵ و نیو بەڕێوەبەری خوێندن و پەروەردەی ئیسلامی بوو لە وەزارەتی ئەوقافی سووریا. دواتر وەکو جێگری بەڕێوەبەر، پاشان بەڕێوەبەری کاروباری کۆمەڵەکان لە وەزارەتی کاروباری مرۆیی و گەشەپێدانی سووریا دەستبەکاربووە.

بەشیر لە نێوان ساڵی 2022 بۆ 2023 لە کابینەی عەلی کیدە، سەرۆکوەزیرانی پێشووی رزگاریی سووریا وەزیری کاروباری مرۆیی و گەشەپێدان بووە.

لە کانوونی دووەمی 2024، ئەنجوومەنی شوورای حکومەتی رزگاریی سووریا لە ئیدلیب محەممەد بەشیریان وەکو سەرۆکوەزیرانی حکومەکەتە راگەیاند.

لە 25-11-2024 دەستەی تەحریری شام و هاوپەیمانەکانیان هێرشیانکردە سەر شارە گرنگەکانی ژێر دەستی حکومەتی بەشار ئەسەد و تاوەکو 08-12-2024، هەریەک لە حەلەب، حەما، حیمس، سوەیدا، دەرعا و دیمەشقیان گرت.

لە کاتی گرتنی حەلەب لە 27-11-2024 بەشیر لە کۆنفڕانسێکی رۆژنامەڤانیدا گوتی، ئەو هێرشەی هەتەشە لە وەڵامی هێرشەکانی حکومەتی سووریا بووە بۆ سەر خەڵکی سڤیل.

رۆژی 04-12-2024 بەشیر گەشتی شاری حەلەبی کرد و سەرپەرشتیاری کردنەوەی نووسینگە و فەرمانگە حکومییەکانی کرد، ئەو هەروەها ستایشی ئەو کارمەند و بەڕێوەبەرانەی کرد کە گەڕانەوە سەر کارەکانیان.