مەسرور بارزانی، لە کۆڕبەندی ئاشتی و ئاسایشی رۆژهەڵاتی نێوەڕاست لە دهۆک وتی: “نزیکەی هەموو مانگێک، ئێمە یەک ملیار دۆلار لەدەست دەدەین، واتە کۆی گشتی زیاتر لە 20 ملیار دۆلارمان لەدەستداوە لە ئەنجامی وەستانی هەناردەی نەوتی کوردستان. بەداخەوە ئەمە زیان بە هەموو وڵاتەکە دەگەیێنێت، بەڵام بێگومان، ئەو بەشەی وڵات کە زۆرترین زیانی بەرکەوتووە، کوردستانە.”

ڕاشیگەیاند: “بەداخەوە ئەو زیانانەی بەرمانکەوتوون، قەرەبوو نەکراونەتەوە، بۆیە دەبینین مووچە دوادەکەوێت، دەبینی داهاتی عێراق بەگشتی کەمبووەتەوە، کە ئەوە لە بەرژەوەندیی حکومەتی فیدراڵی و هەرێمی کوردستانیشدا نییە.”

بەربەستی سەرەکیی بەردەم دەستپێکردنەوەی هەناردەی نەوت رێکنەکەوتنی بەغدا و کۆمپانیا نێودەوڵەتییەکانە لەسەر تێچووی بەرهەمهێنانی نەوت لە هەرێمی کوردستان.

لە گرێبەستی نێوان هەرێمی کوردستان و کۆمپانیا نێودەوڵەتییەکان، تێچووەکە بە سەرووی 26 دۆلار دانراوە، بەڵام لە یاسای بودجەی عێراقدا 8 دۆلارە.

سەرەتای ئەم مانگە، حکومەتی عێراق نیازی خۆی ئاشکرا کرد کە پێشنیازێکی پێشكێش بە پەرلەمانی عێراق بکات بۆ ئەوەی یاساکە لەسەر تێچووی 16 دۆلار بۆ هەر بەرمیلێک هەمواربکاتەوە. هێشتا دیار نییە کەی پەرلەمان دەنگی لەسەر دەدات.