ئاسۆ عەبدوللەتیف

ئۆپۆزسیۆن دەبێ تێبگات لەکوێ سیاسەت دەکا، هێشتا هەندێکیان باوەڕیان بە دەوڵەتی سەربەخۆ نیەو لەناو زیهنیەتی سیستمی فاشیزم و هەژموونی دەوڵەتی قووڵی فەقیەدا دێن و دەچن و دەشیانەوێ کورد وەک دەوڵەتی مۆدێرن و سەربەخۆی دیموکراسی ڕەفتار بکات و دەستاودەستیان لەگەڵ بکات، بەڵێ سیاسەت و حوکمڕانی گرێبەست و ڕێککەوتنە لەگەڵ ئەنکەرەو تاران، کێشانەو پێوانەیە بۆ مانەوە، گەڕانە بۆ خۆڵی ئاڵتوون، هەمانکات تێزابەکەشی پێویستە، خۆ وتمان ئەوەندەش دڵنیا مەبن لە پرۆسەی دەنگدان و دەنگدانیش لێرە گۆڕانکاریی دروست ناکات.

ئەوەی ئێستا ڕووئەدات هاوسەنگی و هێزو شەرعیەتە بۆ دەسەڵات ئیتر تۆ بەدەسەڵاتی ناشەرعی دەزانیت ئەویش تۆ بەدۆڕاو وەسف ئەکا، بۆ ئۆپۆزسیۆن دۆخی پێش هەڵبژاردن یەکپارچە ئیگۆو لوتبەرزیی بوو بۆ سڕینەوەو پاکتاوکردن و ڕوخاندنی ئەم دەسەڵاتدارەی ئێستا، هەمووجار لەگەڵ گورگ گۆشت خواردن و لەگەڵ مەڕ شیوەنکردن باش نییە، ئێوە خراپ فێرکراون و خراپیش هەندراون.

ئۆپۆزسیۆنیش دەسەڵاتداربێت سبەی هەروادەکا، سەدجۆر گرێبەستی جیاوازو کێشەو بێشە دەکات لەگەڵ دەیان دەوڵەت بۆ مانەوەو سیاجکردنی حیزب و حکومەت و بنەماڵەکەی، ئێستا هیچ نەبوە پۆستی لوتکە نایات بەباوکیشی بەیانی چۆن دابەشی ئەکا بۆ خەڵکیتر، مرۆڤ هەرنازانێ هەندێک سەرۆک لیست و بەرە، چۆن چۆنی بوونەتە سەرۆک و بڕیاردەر.

باسی یاساو شەرعیەت و دیموکراسی و وانەکانی مەدەنیەت لەم هەڵبژاردنە، دەسوخەتی مێشکی کاراکتەرەکانی ئۆپۆزسیۆنە، ئێرە عێراقە وڵاتی فیتنەو ئاشوب و گرێبەستەکانە، سەوداو مامەڵە هەیە بەدەنگ و کورسی و حیزب و ئاین و عەقیدەو مزگەوت و کەنیسەو بیرەنەوت و مەرزەکانەوە، فێڵ و بازرگانی هەیە، ململانێ و خوێنڕشتن هەیە، گوێرەکە فرۆشی هەیە بەشەرتی ئەسپفرۆشیی، خۆ هەر ئەوە نییە تۆ لە تیک تۆک و لایڤەکانی فەیس بووک باسی غەدرو ستەمکاری ئەکەی، ئەتەوێ دەمووچاوی ئەوانیتری پێ ڕەش بکەیت، دەی ئەوان خۆیان عەیامێکە کارخانەی خەڵوزیان هەیە!

تۆ وەک حیزب ئاڵوگۆڕی نێوخۆی حیزبیت نییە، دیکتاتۆریەتی پەتی خێڵ و شوانکارەیی پەیڕەودەکەیت، ئۆلیگاریشی دارایی بنەماڵەیی خۆت لەلوتکەو دەورانی خۆیدایە، کۆمپانیاو ڤێللاو باخ و دەبڵ ژن و سەیارەی گرانبەهاو سەدان جۆر مۆدێلات نەخۆشی سایکۆپاتی بۆ دروستکردوون لێتان تێک چووە کێن، چۆن بانگەشەی گۆڕانکاری ڕیشەیی وڵات ئاوا دەکەن و خۆتان هاوتا ئەکەن بەو وڵاتە دیموکراسیانە بۆ ئاڵوگۆڕی دەسەڵات، ئەوە خەیاڵاتی پەمەیی و لوتکەی ڕۆمانسیەتە بۆ گۆڕانکاریی.

ئەسڵەن دیموکراسیەت خۆی هەڵگری سەدان کێشەی جەوهەرییە لەنێوان عەقڵ و بێعەقڵی و جەهلدا، لەنێوان و حەق و باتیڵدا، سیاسەت تەجروبەو عەقڵەو جەوهەرەکەی خۆگونجاندنە لەگەڵ باهۆزەکاندا.

هەر زۆر ناڕازیت لەم دۆخە مەچۆرە پەڕلەمان نەخۆت وەک سەرۆک لیست و نە برادەرەکانت، چونکە دەبیتە بەشێک لەو دیزاینەی ڕەخنەی لێدەگری، پەڕلەمان دەزگایەکی گرێدراوی ڕادیکاڵ و ئایدۆلۆژیە بۆ پتەوکردنی پایەو ڕایەڵەکانی دەسەڵات و شوێنی ئیمتیازەو سیستمی جێبەجێکار نیە، دەسەڵاتی دادوەریش نیە، دەزگایەکی ناسیۆنالیزم و کەلتوریی و مێژووکردو چاودێریکارە بۆ یاسادانان نەک بۆ لێدان لەیاساکان و فشەی کوردایەتی وەک ئێوە دەڵێن، بۆ یەک جار ڕاستگۆبن لەگەڵ خەڵکداو خەباتی ناپەڕلەمانی و دوور لە ئیمتیازو ناو شەقام دەستپێبکەن وەک ئەو خەڵکە ڕەش و ڕووتە بێحاڵ و بێمووچەیە، کە هەمووجار بێئومێدیان دەکەن و خۆشتان یەک گرفتی موچەو داراییتان نیەو ناشبێ.

بیرتان بێ کورسیەکان حوکم ناکەن، حوکم بەڕێوەدەبەن بۆ پاشا، کورسیەکەی ئێوەش هەرکورسیە.