دكتۆر سایە حەسەن دەڵێت، گەڕی نەخۆشییەکی گوازراوەی پێستە، کە لە کەسێکی تووشبووەوە دەگوێزرێتەوە بۆ کەسێکی دیکە، دەشڵێت، هۆکاری تووشبوون بە نەخۆشیەکە بریتیە لە پاراسایتی کۆپان، کە بە Sarcoptes Scabiei ناسراوە، کە بوونەوەرێکی بچووکە و بە چاو نابینرێت.

دكتۆر سایە حەسەن، لێپرسراوی هۆبەی نەخۆشییە گوازراوەكان لە بەڕێوەبەرایەتى تەندروستى سلێمانى لەبارەى هۆکارەکانى توشبوون بە گەڕى ڕاگەیەندراوێکى بڵاوکردەوە.

نەخۆشى گەڕى چیە؟

گەڕی نەخۆشییەکی گوازراوەی پێستە، کە لە کەسێکی تووشبووەوە دەگوێزرێتەوە بۆ کەسێکی دیکە و هەر لە کۆنەوە لە میسر و ڕۆژهەڵاتی ناوەڕاست ناسراوە، کە ئەرستۆ چوار سەدە پێش زایین ئاماژەی پێکردووە.

هۆکارەکانى توشبوون بە نەخۆشیەکە کامانەن؟

هۆکاری تووشبوون بە نەخۆشیەکە بریتیە لە پاراسایتی کۆپان، کە بە Sarcoptes Scabiei ناسراوە، کە بوونەوەرێکی بچووکە و بە چاو نابینرێت و مێینە پیتێنراوەکانی ئەم بوونەوەرە کون یان خەندەق لە ژێر پێستدا هەڵدەکەنن بە مەبەستی هێلکەدانان لە ناوچەکانی نێوان پەنجەکان، چەمانەوەی پێستی مەچەک، جومگەی ئانیشك و جومگەی ئەژنۆ و پێستی چەماوەی مەمک، یان ناوچەی کۆئەندامی زاوزێ، ئەمەش زۆرجار دەبێتە هۆی خورانی توند لە ئەنجامی کاردانەوەی حەساسیەت بەتایبەتی لە شەودا.

ئەم پاراسایتە لە ناوچە هەژارەکان و ناوچە چڕەکانی دانیشتووانی وەک کامپ و زیندان و قوتابخانە و ناوچە قەرەباڵغەکانی تردا زیاد دەکات و بڵاو دەبێتەوە لەناو ئەو دانیشتووانەی کە بەرکەوتنێکی زۆر لە نێوان مرۆڤەکاندا هەیە.